ألو، الآخرة؟ وحياتك إذا ما في إزعاج، فيك تحولني عند الصبوحة، شمس الشموس؟ اشتقتلا وبدّي اتطمن عليها
شو؟؟؟؟ بشو مشغولة؟ عم تحضر فيديو شمس الغنّية إللي دخلت موسوعة غينيس للأرقام القياسية مع إطلالة حملت لقب "أطول زيل رداء في العالم"؟
طيب معليش، بنطر عالخط. شو؟
ما بدّا تحكي مع حدا من لبنان؟ زعلانة منّا ؟خير، ليش؟؟؟؟
آخد عَ خاطرها كيف ما بحياتنا همّيناها واتصلنا بموسوعة غينيس، وخليناهن يعطوها شهادة أطول وأجمل اوووووف اووووف يا بو الزلوووف؟؟؟؟ أوف علينا، ويا خجلتنا منها، ومعها حق، وحقّا علينا، بس دخيلك ذكّرها إنو هي دخلت موسوعة غينيس كصاحبة أكبر إرث فنى بالتاريخ مع 83 فيلم بين مصرى ولبنانى، و27 مسرحية لبنانية، واكتر من 3000 أغنية بين مصري ولبناني. دخيلك ذكّرها.
شو؟ عم بتقول إنو هي أيقونة الموضة و أول فنانة عربية لبست البنطالون والشورت والفساتين القصيرة والشبك؟ معها حق، ونحنا مقصّرين معها ، وما بقى أعرف شو بدّي قول، ويا خجلتنا منها، بس دخيلك وَصِّلا إنو الهيئة "غينيس" عم يعطوا بس أطول " تران"( زيل) فستان. شو؟ الصبوحة عم بتقلّنا يا " تراناااات" ، شال فيروز رفرف بالحارة كلها، مش بس بمحيط ٥٥ متر، فكيف ما بتفوتوها بكتاب غينيس،اذا هيك؟ وهي شخصياً الصبوحة الشحرورة لبْسِتلنا أحلى فستان، ملوّن من كل كل كل شي في الألوان، ما بتستاهل تفوت عليه على موسوعة غينيس؟؟؟؟ ومش بس هيك، هي لبست فستان مشكوك بلمبات كهربا مشعشعين اكتر من كل شي في لمبات مطفيّة بلبنان؟
خلص، خلص، معها حق، قلّا معك حق ، ونحنا شعب خرجنا نفوت بموسوعة غينيس تحت خانة اكتر شعب مطفي و " ترانااات" ، وما تنسى تقلّا كمان إنو "زيل" التراناااات اللي متلنا، حطوه ٢٠ سنة بالقالب وضل أعوج.وهيدي كمان منستاهل عليها شهادة من غينيس .
