حضرات بعض المسؤولين عن المواقع الاعلامية الالكترونية، اسمحولي هنّيكن على مهنيتكن واحترافيتكن ومصداقيتكن وتوخيكن الدقة والحقيقة، بعيدا عن العناوين المُضللة للرأي العام و الطنانة والرنانة واللي معظمها فارغة متل الطبل من جوّا ، وتحديداً متل عنوان" زياد برجي انتصر على اليسا بدعوى اغنية وبطير"… يا حضرات بعض المواقع الاعلامية الفنية ، زياد برجي كلنا عارفين شو مشكلتو ، وقالها بلسانو, وكان رح يفقعلو عرق هو وعم بيأكّد بأحد البرامج التلفزيونية "بدّي فقّعها" .
لهيك من الطبيعي يزتّ حكي قد ما بدّو ، ويغني مواويل قد ما بدّو، ويفقع تصريحات قد ما بدّو (اكتر من هيك ما في يفقع شي) لأنو هيدي مصلحتو. بس إنتوا شو مشكلتكن؟ إنتوا إعلام ومسؤولين عن كشف وتوضيح الحقائق للناس ومش رش الرماد بالعيون. اذا زياد برجي مصلحتو يقول انتصر على اليسا، انتوا مش من مصلحتكن تطبلولو وتزمرولو وتستعملوا عناوين غايتها تجذب القراء وتضلّلن على حساب الحقيقة. إنتوا واجبكن ومسؤوليتكن توضّحوا الحقيقة، وتستوضحوا حول الحكم اللي صدر، وتشرحوه للناس من بعد ما تكونوا إنتوا فهمتوه ، مش ترددوا اللي عم ينقال متل الببغاء ، وتزتّوا فرقيع الاحتفالات والانتصارات الوهمية . عيب ، إنتوا إعلام وصحافة، يعني إنتوا سلطة رابعة، يعني ضروري تشرحوا للناس إنو الحكم اللي صدر ما إلو علاقة أبداً بالانتصارات الدونكيشو-برجية. الحقيقة هي التالي: المدّعى عليه برجي اعترض على قرار قاضي الأمور المستعجلة الصادر لمصلحة اليسا ( وهيدا حقو يعترض قدّ ما بدّو) ، ولحدّ اليوم ما تمّ البتّ بالاعتراض. لهيك صدر قرار بوقف العمل بقرار قاض الامور المستعجلة لحين البتّ باعتراض برجي. انتبهولي على " لحين البتّ فيه" ، يعني ممكن اليسا تطعن بهالإجراء ، وممكن كتير البتّ فيه يرجع ينصفها لأنها صاحبة حق شاء من شاء وأبى من أبى، ولأنها اشترت هالاغنية، وما ضربت حدا ع ايدو ليبيعها ياها، ولا حطتلو الفرد براسو وههدتو " يا بتتنازل عن الاغنية يا بتتنازل عن حياتك". متل ما ملاحظين يا اعزائي المواقع الفنية، إليسا ما بقى عم تحكي بهالموضوع إلا لم يكون بايدها مستند رسمي وحكم نهائي، ولأنو الناس ملّت من هالسيرة، ولأنها واثقة بالقانون، ولمّا يقول كلمتو النهائية، ساعتها "يضحك كثيرا من يضحك أخيرا".
يا اعزائي المواقع الفنية، بالحياة في ربح وفي خسارة، عادي وطبيعي. بس اللي مش عادي ولا طبيعي ابدا ، إنو الانسان يخسر كرامتو وتقدير الناس لإلو من ورا تصرفات زغيرة كتير، وما ممكن ترجع تكبّرو بعيون الجمهور ابدا. واللي مش طبيعي اكتر، إنكم حضراتكم تركبوا موجة السكوب والعنوان الطنان والرنان، وما تكلّفوا خاطركن تدأدسوا وتستوضحوا الحقيقة و… شكراً، ادامكم الله منارة للحق والحقيقة
